Borgin okkar er skítug og menguð

Það var yndislegt að njóta góða veðursins með litlum ömmu strák í gönguferð í Vesturbænum  í gær.  Gengið var frá Sólvallagötunni í Melabúðina sem er okkar hverfaverslun. Tilgangur ferðarinnar var að kaupa inn það sem sá litli vildi fá að borða næsta sólarhringinn.  Ferðin í Melabúðina tók klukkutíma því litlir fætur far hægt yfir. Prinsinn sagði við ömmu sína.  Það er svo mikill hávaði í bílunum.  Þetta var rétt hjá þeim stutta, hávaðinn var gífurlegur frá þeim bifreiðum sem framhjá óku.  Við fullorðna fólkið erum orðin samdauna þessum hávaða. En þvílíkur hávaði sem blessað barnið upplifði enda fer sá stutti allar sínar ferðir í bíl.  Sá stutti stoppaði við hvert fótmál og skoðaði veröldina með sínum augum.  Það er skelfilegt að horfa upp á borgina sína svona skítuga.  Sá stutti sankaði  að sér öllu því gulli sem á vegi hans varð.  Eru götur bæjarins virkilega ein stór ruslatunna?  Niðurstaða mín eftir göngutúrinn góða í blíðskaparveðri hér í Vesturbænum í gær að borgin okkar er menguð bæði hljóð og loft menguð og óþrifnaðurinn fyrir neðan allar hellur.

 

Athugasemdir

[Guðrún María Óskarsdóttir., 21.4.2008 kl. 02:40]

" Bragð er að, þá barnið finnur " segir máltækið og sá stutti hefur án efa lög að mæla í þessu efni.

Þegar svo er komi að meirihluta landsmanna hefur verið gert að búa og vinna saman á afmörkuðum skika lands þar sem gatnakerfi er í engu samræmi við íbúaþróun , þá fer sem fer.

Nagladekk ættu ekki að vera leyfileg í innanbæjarakstri, einkum og sér í lagi ef litið er til leyfilegs bílafjölda per landsmann.

góð kveðja.gmaria.