Rauðmagaveisla Frjálslynda flokksins í Grindavík.

Minni á að í  kvöld verður haldin rauðmagaveisla á vegum Bæjarmálafélags Frjálslynda flokksins í Grindavík og hefst kl. 19.00. Þátttaka tilkynnist í síma 895-7237. Gestum verður boðið upp á rauðmaga, þorsk, rauðsprettu og skötusel að kostnaðarlausu.  Félagar og aðrir áhugamenn um stefnu Frjálslynda flokksins hjartanlega velkomnir.

kkv.

Líflegt í Frjálslynda flokknum,frítt í rauðmagapartý.

Þeir sem fylgjast daglega með heimasíða Frjálslynda flokksins sjá að mikið líf og starf er í grasrót flokksins.  Föstudaginn 18. april verður glæsileg samkoma haldin á vegum flokksins í Grindavík. Þá verður haldið rauðmagapartý á vegum Bæjarmálafélags Frjálslynda flokkisns á staðnum.  Veislustjóri verður Magnús Reynir Guðmundsson framkvæmdastjóri Frjálslynda flokksins sem mun auk þess sjá um harmonikkuspil. Nú er tækifæri til að smakka  á hinum ýmsu tegundum sjávarafurða.  Boðið verður upp á að smakka rauðmaga, þrjár tegundir af þorskréttum, rauðsprettu og skötuseli.  Úrvals kokkar á svæðinu munu matreiða sjávaraflann eftir sínu höfði.  Samsætið verður í húsnæði Björgunarsveitarinnar Þorbjörns Seljabót 10 í Grindavík.  Allir velkomnir meðan húsrúm leyfir. 

Með rauðmagakveðju

Árangursmæling.

Ég á það til að fylgjast með umræðum á Alþingi Íslendinga þar sem ég er mikill áhugamaður um stjórnmál.  Nú er klukkan að verða 12 á miðnætti og Alþingi enn að störfum.  Hvernig væri nú að árangursmæla það sem fram fer á þinginu?

Athyglisverð frétt í Klippt og skorið á bls.15 í 24 Stundum í dag.

Alltaf verður maður nú jafn hissa.  Ég sit í aðalstjórn KRFÍ og verið boðuð á einn slíkan fund frá því ég kom inn í stjórnina á síðasta ári fyrir hönd Frjálslynda flokksins.  Aðalfundur KRFÍ var haldinn 15. april s.l. kl. 17.00.  Mætti ég á tímanlega á fundinn og hlakkaði til þessa fundar þar sem ég er ný og þetta minn fyrsti aðalfundur hjá KRFÍ.  Ég mætti ein til fundarins og sat fundinn til kl. 18.50 en þá yfirgaf ég fundinn hljóðlega, til að trufla nú ekki athygli fundarmanna ,vegna fundar sem ég átti að mæta á kl. 19.00 í Skúlatúni 4 á vegum Frjálslynda flokksins.

Þessi frétt er með ólíkingum sem birt er í 24 stundum í dag fimmtudag 17. april sem ég ætla að leiðrétta. Mér skilst að þessi frétt hafi flogið út um allan bæ í gær, ekki frétti ég hana.  En getur það verið að konur séu konum versta.  Hverjum er það til tekna að búa til slíkar sögur og breiða þær úr. Góð spurning ekki satt, en ég ætla ekki að reyna að svar henni.

1.  Í fyrsta lagi var þess hvergi getið í fundarboði um aðalfundinn að skipta ætti um formann og varaformann.

2.  Undirrituð las um það í fjölmiðlum daginn eftir aðalfundinn að Margrét Sverrisdóttir hefði verið kosin formaður KRFÍ og ekkert nema gott um það að segja.

3.  Hvergi auglýsti KRFÍ mér vitanlega eftir konum sem gæfu kost á sér í kjöri til formanns né varaformanns.

Þannig að fréttin um að ég sæktist eftir formennsku í KRFÍ eru úr lausu lofti gripnar því ef fólk ætlar að gefa kost á sér í slíkt embætti þarf að auglýsa slík framboð.  Í dag get ég bara ekki bætt á mig fleiri blómum til þess þyrfti ég fleiri klukkutíma í sólarhringinn.

Ef ég hefði vitað að skipta ætti um formann og varaformann sem ég vissi ekki um en gefum okkur að ég hafi  haft í huga að bjóða mig fram til formanns hjá KRFÍ þá þarf að undirbúa slíkt framboð mjög vel.

Ef Margrét hefur smalað á fundinn gekk sú smölun mjög illa því þessi fundur var með afbrigðum fámennur.

kkv.

Ásgerður Jóna Flosadóttir

 

120 fjölskyldur þáðu aðstoð í dag.

Nú er dagur að kvöldi og hjálparliðar komnir heim til síns heima sáttir í hjarta sínu eftir góðan dag hjá Fjölskylduhjálp  Íslands.  Í dag úthlutuðum við matvælum til 120 fjölskyldna.  Hver fjölskylda fékk allt upp í 6 matarpoka  en að meðaltali eru pokarnir á milli 4 og 5 pokar á fjölskyldu.  Við úthlutuðum hátt í 200 kílóum af slátri og lifrapylsu.  Mikið úrval var af matvælum hjá okkur í dag og fóru allir skjólstæðingar ánægðir út frá okkur.  Útlendingum hefur fjölgað mikið meðal þeirra er leita aðstoðar, auk þess  sem karlar sækja í auknu mæli eftir aðstoð hjá okkur og eru þeir orðnir álíka margir og konurnar.  Þá kom fólk til okkar sem synjað hafði verið um lyfjastyrk hjá öðrum hjálparsamtökum en sem betur fer erum við með lyfjasjóð  og getum því hjálpað þegar þannig stendur á hjá skjólstæðingum okkur.

Hjartans þakkir til íslenskra fyrirtækja fyrir aðstoðina.

kkv.

Ásgerður Jóna Flosadóttir

Komið með fötin, leikföngin og búsáhöldin til okkar.

Fjölskylduhjálp Íslands úthlutar fatnaði alla miðvikudaga. Tökum á móti notuðum hreinum fatnaði á alla aldurs hópa.  Þið sem eigið notuð föt, búsáhöld og leikföng og viljið losna við þau, vinsamlegast komið með þau til okkar.  Tökum á móti alla miðvikudag frá kl. 13.00 til 17.00 að Eskihlíð 2 - 4. Reykjavík.

kkv.

Ásgerður Jóna Flosadóttir

Slátur og lifrapylsa.

Nú er undirbúningur á fullu fyrir úthlutun hjá Fjölskylduhjálp Íslands sem er í dag miðvikudag eins og alltaf.  Við er mjög lukkulegar með okkur þessa stundina því í dag úthlutum við slátri og lifrapylsu sem er frábær matur.  Náði góðum díl við einn framleiðanda hér á landi.  Þá verður jógúrt og önnur mjólkurvara auk brauðmetis  á boðstólnum í dag.  þá úthlutum við kaffi einu sinni í mánuði en kaffið kaupum við einnig.  Það er yndislegt að úthluta góðum og hollum mat.

kkv

Ásgerður Jóna Flosadóttir

Guðmundur Ólafsson hagfræðingur fór á kostum.

Mikill undirbúningur var fyrir fyrsta súpufund Landssambands kvenna í Frjálslynda flokknum sem haldinn var í gær í félagsheimili flokksins að Skúlatúni 4.  Við konurnar löguðum guðdómlega góða súpu og buðum upp á heimabakaðar brauðbollur. 

Guðmundur Ólafsson hagfræðingur talaði fyrir fullu húsi fundagesta og fór á kostum.  Hef oft velt því fyrir mér hvers vegna Guðmundur sé ekki fenginn í Seðlabankann og taki við stjórninni þar.  Hann býr yfir þvílíkum fróðleik í hagfræði ,er sjálfsagt einn af okkar bestu hagfræðingum landsins.  Góður rómur var gerður af framsögu hans á fundinum og færri komust að en vildu með fyrirspurnir.

Ég vil endilega vekja athygli á því að fundur hjá Landssambandi kvenna í Frjálslynda flokknum er fyrir bæði konur og karla.  Á þessum súpufundum okkar er rædd pólitík og ekkert annað og því hentar það báðum kynjum. Misskilnings hefur gætt að fundir okkar séu bara fyrir konur en svo er alls ekki.  Næsti  súpufundur verður 26. april sem er laugardagur og hefst fundurinn stundvíslega kl. 12.00.

Helgin átti nú öll að fara í lestur fyrir próf sem ég fer í á mánudaginn í fjölskyldu og erfðarrétti en leyfði mér nú samt að fara í Borgarleikhúsið í gærkveldi og sá hina frábæra sýningu  Jesus christ superstar.  Þar voru í hlutverkum frábærir söngvarar en sá söngvari sem skar sig úr var Jens Ólafsson sem fór með hlutverk Júdasar.

En þá er best að snúa sér að skruddunum.

kkv.

Stopp,stopp ,ekki meir ekki meir.

Ég eins og svo margir sem eru alltaf á leiðinnnnni til heilbrigðara lífernis, ákveðin  í að breyta fæðuvalinu og borða reglulega.  Það er nefnilega fitandi að borða of lítið vissu þið það?  Búin að eiga kort hjá Frú Báru í JSB í þrjár vikur en var fyrst í dag að drattast í fyrsta tímann sem var yndislegur því ég fílaði mig svo granna eftir tímann TAKIÐ EFTIR FÍLAÐI MIG SVO GRANNA.  Stundum erum við svo feit í huganum að það hálfa væri nóg.  Eftir tímann hélt frú Bára fund með okkur og fór yfir það sem má borða, sem við vissum náttúrulega allar mætavel, margar með æviáskrift hjá Báru.  Eftir tímann dreif ég mig út í búð og keypti allt það heilbrigða og holla sem ég fann í búðinni. 

Það sem ég hef borðað í dag er eftirfarandi. Fjögur hrökkbrauð, lífræn kæfa, papriku sem er best  RAUÐ, lífræna súpu  hýðishrísgrjón og tómat.  Fer aftur á vigtina hjá Báru næsta fimmtudag og þá verður vigtin að vera vinkona mín.

Satt best að segja var ég ein af þeim sem keypti öll líkamsræktartæki og hafði heima hjá mér.  Hefði getað opnað líkamsræktarstöð, slíkt var brjálæðið.  Ég hef orðið skynsamari með árunum og hætt að hlaupa eftir slíkum dellum.   Í dag á ég hlaupabretti, lóð og æfingamöttu heima hjá mér og læt það duga.

Það að breyta fæðuvalinu kallar á að maður verður að sleppa rauðvíninu og hvítvíninu sem mér finnst hrikalegt.  Ég er nefnilega mjög hrifin af léttvíni.  En nú verður tekið á honum stóra sínum og ekkert gefið eftir.

Hvar getur Fjölskylduhjálp Íslands keypt kartöflur á góður verði?

Undirbúningur er hafinn fyrir úthlutunina á morgun miðvikudag.  Gerði góð kaup hjá honum Leifi í Kjarnafæði með hakkað kjöt og pantaði ein 150 kíló.  Okkur hefur mikið vantað kartöflur og ef það er einhver þarna úti sem getur selt okkur góðar kartöflur þá vinsamlegast hafið samband við okkur.  Búin að panta mjólk, léttmjólk og fjörmjólk.  Þá verðum við með egg, brauð og svo fáum við alltaf eitthvað frá Dreifingu ehf.